Ахиллийн шөрмөс - 8

2012-10-29

Нэг жил гэдэг харвасан сум шиг л өнгөрлөө. Өдийд, 365 хоногийн тэртээ, би огт санаандгүй байдлаар хөлөө гэмтээгээд, анх удаа л тэр шөрмөс тасрах гэдэг зүйлийг сонсож, мэдэрч билээ.  Сүүлд нь бодоод л байхнээ, жилийн өмнө л Боогий надад энэ тухай ярьж байсан нь толгойд харван орж ирээд, хүн гэдэг ч өөр дээр л ирэхгүй бол аливаа зүйлийг ингээд ойшоодоггүй л юм байна даа гэж бодож суусансан. 

Энэ хугацаанд хэрэндээ л их туршлагажлаа. Мэдээлэл авч, дүгнэлт хийж байсан ч дахиад л алдаа. 

2012-11-16

Дээрхийг цувралынхаа дараагийн дугаар болгоод жилийн дараа гээд бичиж эхэлсэн байсан ч тэр чигт нь орхисон байснаа одоо л үргэлжлүүлж байна. 

Тэр алдаа гэдэг нь юу гэхээр, хүн хэлээд л байхад айраг ихээр ууж хөлөө дахин өвтгөсөн явдал байлаа. Ер нь ясны төдийгүй махны гэмд ч айраг сайнаар нөлөөлдөггүй бололтой. Ясанд бол угаасаа дотроос нь айраг ууж, гаднаас нь шавших замаар задалдаг гэх. Буруу бороолсон бол задалж эдгээхийн тулд тэгдэг юм байна л даа. Гэтэл энэ нь зөөлөн эдэд ч бас тийм сайнгүй юм байна. Дуртай юмнаасаа татгалзах хэцүү болохоор 9-р сард нэлээн ихээр айраг ууснаас болж зунжин өсгийт өмсөхөд өвдөөгүйгээрээ хөл маань өвдөх боллоо. Гэхдээ айрагнаас болсон гэдгийг нь их хожуу мэдсэн л дээ. 

Уг нь бол эмчийн хэлснээр 6 сарын турш маш сайн гам хийснээр ер нь гайгүй болно гэсэн хэдий ч надаас шалтгаалах зүйлээс болоод ингээд өвчнөө уртасгачихлаа.
Асуусан, надтай ижил асуудал бүхий хүнд хэрэг болох болов уу гээд бас дараах хэдэн зүйлийг тэмдэглэе.

Одоо ч гэсэн шөрмөс маань маш хатуу, эвгүй гишгэлт, хөдлөлтөнд хөндүүр болж үлдсэн байна. Ер нь удаан хугацаанд хөдөлгөөнгүй байсан булчин шөрмөсийг чангалах, сунгах дасгалуудыг сайн хийж байх нь маш тустай юм билээ. Одоо ч гэсэн л сунгалт хийхэд эвгүй л байх юм. Анх гипсээ авахуулсны дараа бол баруун хөл бүхэлдээ их сунжгар байсан. Харин одоо гайгүй болж байна л даа. Гэхдээ хагалгаа хийлгээгүй эдгээсэн хүмүүсийн хувьд бүр хатингаршдаг тохиолдол байдаг юм билээ.