Цагаан сар уу, урт шар уу? Юутай ч хүрээд л ирлээ дээ.

40 нас руу дөхөөд ирэхээр, бас юм юм бодогдох л юм. Найз хүүхнүүдээ охид гэж дуудах, дуудуулахдаа дуртай байсан. Энэ бие хааны байгаа царайг харахад өөр нэрээр дуудуулахад зохимжтой болох нь уу даа гэмээр байна шүү...

Цагаан сар гэж, цаг хугацаа гэж хурдан юм... Яах ийхийн зуургүй ажил орох боллоо. Хавар ийм хурдан билүү гэмээр ямар сайхан өдрүүд өнгөрөв өө. Өнгөрсөн өвөл шиг хахир хатуухан, урт өвлийг давсан хүн байтугай малын зоо тэнийдэг нь аргагүй юм аа гэмээр сайхан өдрүүд байлаа. Ер нь хавар ирэнгүүт л налайгаад дулаарчихдаг, сонин шүү. Хаврыг их л зөв тооцдог шиг байна энэ сарны тоололд. 

Жилийн 365 хоногийн ихэнхийг бид өдөр тутамдаа баригдаж, сааралдуухан өнгөрөөдөг болохоор; жилдээ ганц уулзаж байгаа хүмүүс олон болохоор; өнгө өнгийн дээлээр гоёсон гоё хүмүүс өнгө оруулдаг болохоор; бүх хүн л билэгтэй сайхан үгс хэлэлцдэг болохоор; авсан бэлгэндээ баярлах хүүхдүүдийн хөөр их болохоор сайхан л баяр юм. Тэгж мэдэрдэггүй л байж дээ. Одоо тэгж бодох болж.  Бас л нөгөө өөр нэртэй холбоотой байх даа...

Яагаад ???

...бидний л тарьсан мод ургадаггүй,
...бидний хийсэн ажил муу-насгүй болдог,
...бид эргэн тойрондоо санаа тавьдаггүй,
...бидний амьдрах газар шороотой-бохир-хогтой-өнгөгүй байдаг юм бэ??? Яагаад ?

2015-05-11, УБ

Жинхэнэ түйрэн мөн биз дээ?

Шуурга

"Жаахан тогт, Сэтгэлээ тогтоо, хүндрүүлэгч хэрэгтэй байна чамд" гэж Туул хэлсэн. Үнэхээр тийм байна. Дотогшоогоо өнгийгөөд харсан чинь... тэгж хэлэнгүүт нь нүдээ аниад өөрийгөө чагнасан чинь дотор бөөн шуурга. Харагдах үзэгдэх юмгүй л хар шуурга. Юу ч тодорхойгүй. Хаана зогсохоо ч, хаанаас гарснаа ч мэдэхгүй, харах баримжаа ч үгүй л аймаар санагдлаа. 

Шуурга намдааж, тэнгэр цэлмээх хүчин зүйл надад хэрэгтэй байна. Тэр бол ном гэж Туул хэлсэн. Уншаад байж дээ... 

Ном нь юу ч байж болох шүү дээ. Хүн гэдэг чинь бүхэл бүтэн ном. Гайхам сайхан ном, бүр агуу том ертөнц. Тийм болохоор сайхан "ХҮН-НОМ" олдвол зүгээр л юм байна.

Сэлэнгийн замд, Малчны хотонд...

Сарын дараа, яг сарын дараа буцаад явсан чинь Хавар жинхэнэ утгаараа айлчлаад ирчихжээ.

Хоёрхон өнгө, үнэхээр гоё...
2012-02-25

Хаврын адаг сарын шинийн 28

Хан Хэнтийн дархан цаазат газрын салбар Тэрэлжийн уулс, "Аянчин" жуулчны баазад

Бороо

Өнөөдөр анхны бороо орсон. Өглөө тэнгэрийн дуунаар цочиж сэрээд. Оройтож унтсан болохоор эргээд унтмаар байсан ч гэсэн бороо орох чимээ нойрыг хаа нэг тийш нь хулжаан хөөгөөд би гэдэг хүн чинь орноосоо үсрэн босох шив дээ. Гадаа хүмүүс шүхэр бариад алхаж байгааг харахад гоё байна лээ шүү :-) Би бол норох хүсэлтэй байсан учир зүгээр л зорилгогүй алхаад л...

Бороо бороо ороорой
Оросын маамуу ирээрэй

/Өнгөрсөн жил блогтоо бас л ингэж бичсэн санагдаж байна... Гэхдээ яахав/

Амьдрал бидний зүрхэн дундуур өөр өөрийнхөө өнгө, хэмээр урсаад л...

Өчигдөрхөн улаан шороогоор шуурч, Богд уул ч харагдахаа больж байсан тэнгэр өнөөдөр "Тэр чинь би биш" гэсэн аятай хачин дулаахан, тогтуун, нарлаг... бүр +25 хэм дулаантай халуун өдөр болж байх чинь. Хаврын тэнгэр ээ гэж... Тэнгэрийн муухай арилах л юм даа. Өчигдөр шиг өдөр олон битгий байгаасай.

Хавар нээрээ л сэтгэл хөвсөлздөг бололтой. 3-р сар дундаа ороход л өмнөх 2 сарынхаа бичлэгийг нийлүүлснээс бараг 2 дахин ихийг тэмдэглэж. Хэрэгтэй хэрэггүй ч гэлгүй л бичмээр санагдсан хэрэг байх :-)
За тэгээд өнөөдөр...
Үнэхээр хүлээн зөвшөөрсөн тул доорх зүйлийг, Y!M-ээр ирдэг зөндөө олон зүйлсийг миний жагсаалтанд нэр нь байхгүй хэн нэгэн бас уншаасай гэж бодоод үлдээдэг тэр л зангаараа энд үлдээхээр шийдлээ. Бодол маань явсаар байгаад тавилан болох бололтой. Зөв бодолтой явбал хувь тавилан зөв эргэнэ гэсэн үг байх нь...

Юу бодож буйгаа анхаарч бай, учир нь бодол үг болдог.
Юу хэлж буйгаа хянаж бай, учир нь үг үйлдэл болдог.
Юу хийж буйгаа анхаарч бай, учир нь үйлдэл зуршил болдог.
Юуг үргэлж хийдгээ анхаарч бай, учир нь зуршил маань зан чанар болдог.
Зан чанараа анхаарч бай, учир нь зан чанар хувь тавилан болдог.

Хэрэв Та үүнийг хүлээн зөвшөөрч байгаа бол бусдын тусын тулд цааш нь дамжуулна уу!!!

/мессенжерээр ирэв/

Хүйтний ам цаашилж Хүүхний гуя наашиллаа гээд л радиогоор рекламдаад байх юм. Уг нь хөхүүрийн ам наашилна гэдэг билүү?
Хавар ийм хурдан, ийм эрт ирж, ийм дулаан болж, ингэж их сэтгэл хөдөлгөдгийг бараг мэдэхгүй юм байна гэмээр байна энэ хавар. Онцгой сайхан дулаахан байна шүү цагаан сараас хойш. Усны шувууд бараг ирэх гэж байгаа байх даа.

Шинийн нэгний өглөөний нар

Энэ жилийн шинийн нэгний өглөө Баянхонгор аймгийн нэгэн сумд наран дээр харагдсан бурханы /магадгүй бурхан багшийн/ дүр 1 иймэрхүү байсан гэнэ.
Харах тусам сонин гоё ч юм шиг санагдаад байгаа.

Та нар энэ тухай мэдсэн үү? ТВ-ээр гарсан гэсэн.

Фотог Н.Магсаржаваас...
Үргэлжлэл бий...

Сар шинэдээ сайхан шинэлцгээв үү

Өнөөдөр битүүний өдөр. Өдөр ч гэж шөнө орой болжээ, удахгүй шинийн нэгний өдөр гарах гэж байна.
Цагаан сар сонин баяр шүү. Сарын хүнсээ идэх гэж яарна, ихдүүлчихээд зовно. Эсвэл манайхан л ингэж тэмдэглэдэг юм болов уу? Уг нь ЦАГААН САР юм чинь мах идэхгүй цагаан идээ хэрэглэнэ, бэлэг сэлт гэхгүй гэдэг ч аймаар өөхтэй тарган хонины ууц, махан бууз, зууш салат, жимс чихэр, архи дарс гээд л явж өгнө. Нөгөө муу ходоод өнгөрсөөн өнгөрсөн.

Сар шинийн мэнд дэвшүүлье!

Өнөөдөр хэдэн өдөр ирээгүй, ороогүй өрөө болох БЛОГ-оороо орж ирлээ. Сэтгэл санаа тиймхэн байгаад, бас завгүй байгаад. Гэхдээ дөнгөж сая хамаагүй дээр болоод, хэдэн өдөр нухсан зүйлээ учрыг нь олж баярлаад, босч 00 орчоод, тэгээд шууд наашлах шив.

Монголд маань үндэсний томоохон баяруудын нэг болох гээд, хүмүүс гадуур хөл хөдөлгөөн ихтэй байна. IT Park дээр үзэсгэлэн гарч байгаа юм байна. Очиж ходоодоо шоколадаар баярлуулчаад гарч ирлээ. Сав баглаа боодлын хувьд ч тун дажгүй зүйл олон байна шүү, таалагдлаа. Зөндөө л юм зарж байна л даа уг нь.